財資市場雜誌「基點」話內地房地產公司碧桂園既主席楊國強，很大機會透過收購邵氏，而成功取得TVB的控制權．市場耐不耐就傳TVB傾緊賣盤，但近期呢單料，係由基點率先爆出黎，所以基點話楊國強會贏，有一定的可信性。如果交易成事，TVB新聞路線肯定面目全非．奇怪的是，呢單野咁重要，但很多人只當係一宗普通的財經新聞，可能大家太關注四川災情吧．

楊國強係內地做開地產，點解忽然想買香港電視台，首先要由佢既發迹史講起．睇番資料，楊國強1979年係順德做泥水匠，1989年佢係順德北滘鎮、鎮政府旗下建築公司任職，升左做經理，當年佢34歲，只是高級打工仔一名，而係1993年楊國強與一些同鄉夾份，買左呢間建築公司，自己做埋老闆，現兜兜俾左3395萬元人民幣。係95年再用8000萬元人民幣收購埋碧桂園住宅項目，即係前後俾左億幾元人民幣．90年代的億幾元人民幣，係一筆天文數字，就算做到經理，又同人夾份，又點攞得到出黎？

很多民企老闆，第一桶金的來源都十分神秘，好像從天而降一樣，究竟點解，我都唔知．佢地通常的做法，係悶聲發大財，儘量不引起外界注意．

楊國強一向好低調，衰就衰在佢趁市旺將碧桂園上市，由於公司市值大，令到楊氏家族做左中國首富。楊國強己經將股權交左俾二女，自已盡量低調，但既然做左首富，想唔見報都好難．正所謂槍打出頭鳥，早排內地傳媒便有很多關於碧桂園違規圈地的報道．據聞楊國強同埋佢間公司都唔係好識應付傳媒，所以這些壞消息愈傳愈勁，後尾佢主動出黎澄清左，風波先至暫時平息．有些人說，楊國強雖然係內地首富，但係政治上並沒有強力的靠山，一出順德就搞唔惦．

我純粹「斷估」，楊國強可能認為低調策略已經不再可行，佢現在一定要取得社會影響力，才可保護他的財富，而買傳媒係一個好方法。內地傳媒買唔到，買香港傳媒也一樣惦．事實上，除左N集團之外，中央對所有香港傳媒機構的老闆，多多少少都會俾下面的．據聞S報經營困難，但其內地老闆一直不肯放手，也是有咁樣的戰略性考慮．

一來傳媒機構可以影響香港民情，而香港始終是內地的重要城市；二來好多消息都可以轉口番內地，就好像早前西藏事件，很多內地人便透過各種方法收看香港電視台的新聞片．基本上佢地連CNN都睇到，但以口味黎講，當然係香港電視台較為接近．

如果講影響力，TVB相信係香港最大影響力的傳媒機構，對中央好重要．唔好講笑，胡錦濤係四川賑災期間，都要走埋去同TVB記者講兩句．

撞啱邵六叔年事己高，願意賣盤，楊國強當然好有興趣買．除左楊國強之外，有些外資私募基金都想買，但外資只看TVB本身的盈利，而TVB對楊國強有更大的意義，所以楊國強願意出最高價的機會很大．

不過，要搞好一間電視台，並不單單是播劇集，還要維持一個有公信力的新聞部，這取決於大老闆是否對本地社會有承擔。邵六叔係大慈善家，有頭有面，係過去幾十年，佢大致上可以做到電視新聞公正持平。例如在03年的23條事件，TVB新聞也公平對待反對派人士的意見，與親中資金控制的ATV有明顯差別。如果TVB賣盤，楊國強又係咪可以維持編採相對獨立？老實講，我就十分懷疑。如果呢單交易成事，TVB新聞肯定無野睇，大家要有心理準備了．